انا المسجون فى شرايينك
وريحة عرقى من طينك
انا اللى رسمت قرص الشمس
فى جبينك
وانا اللى حفظت قرأنك وانجيلك
ووقت المد .. اكون لك سد
عشان ناسك تعديلك
ووقت ما تبقى محتاجة
باقدم لك قرابينك
عشان ترضى
ولما يهل موج غضبك
باغنيلك مواويلك
عشان تهدى
يهون العمر ما تهونى
يخون الكل ما تخونى
ولو ضلم عليكى الليل
انور لك بدمع العين قناديلك
أجوع وأعطش ولا تجوعى
ابيع دمى عشانك انت ما تبيعى
ولما اتعب من الايام
وتهجربى بقى الاحلام
بتجمعنى مواويلك
فى ضل النخل والصفصاف
على نيلك
ما انا نسلك وانا زرعك
وبس انت تشاورى لى
وانا اجيلك
عشان اغزل مواويلك
#محمدعبدالجواد
