شعر سامي النويهي
ـــــــــــــــــــــــــ
بقوا بينّا وواقع فى حياتنا شياطين الإنس
مش حِكر وجودهُم على مِلَّه أو لون أو جنس
دول شبه الناس إنما مش ناس
بقلوب منزوع مِنْها الإحساس
الشر معَشْشِّ جواهم وبانيلُه بيوت
مش فارق أبداً وياهُم الخلق تموت
ملايين تتشرد تتورط فى صراع ع القوت
بحروب مصنوعه اللى صنعها عايش مبسوط
برصاص غدار نازل بالنار على روسهُم صَبْ
أطفال تتيتم والفاعل مادخلش الحرب
الفاعل عامل للجاهل توكيل بالضرب
ودا فيروس إنتاج معاملهُم ودا بالتأكيد
ياخد دَوْرِتُه واما يرَوَّح بيجينا جديد
خطه ومرسومه بتتنفذ حسب المواعيد
فعلاً شياطين مش بنى آدمين
يعلم ربنا على إيه ناويين
بيقولوا عشان تبقى الدنيا مش للأشرار
والأرض تكون جنه بتجرى تحتها أنهار
من أصل تمانيه يموت سبعه ويعيش مليار
سامى النويهى
