أصل اسم السنبلاوين
السنبلاوين ليست مجرد مدينة ولكنها مقاطعة مصرية لها تاريخ، وعلى الرغم من إنها بهدلتنا بجلب التوكتوك اللي نشرته في كل مصر، ولكن يكفيها إنها أنجبت «أم كلثوم» أهم مطربة في تاريخ العرب، و«أحمد لطفي السيد» أهم مفكر مصري بخلاف مئات المتفوقين في كل مجال • ولو رجعنا بالتاريخ إلى آلاف السنين ستجد أنها كانت منطقة عاش فيها 18 أسرة مالكة ضموا أكتر من 500 ملك وملكة وأسرهم في عصور الفراعنة.
•
ورغم ذلك أصل اسمها محير • كانوا زمان يقولوا إن السنبلاوين معناها «السنبلة وين» لأن بنت اسمها سنبلة تاهت فأهلها كانوا بيدوروا عليها ويقولوا: السنبلة وين؟ يعني سنبلة فين؟، طبعا دا كلام غير منطقي باقول لك السنبلاوين عاش فيها 500 ملك وملكة: تقولي السنبلة وين؟!
كانت ولا زالت عادة عند المصريين لجهلهم بلغتنا المصرية القديمة ، انهم يخترعوا أسباب لأسماء المدن زي «دمنهور» اللي قالوا كان فيه معركة عظيمة في المنطقة وسال فيها الدم زي النهور فسميت دمنهور «دمنهور تعني مدينة حورس»• وقرية بلامون أصلها: بلاء أمون • وقرية قولنجيل أصلها: كلوا نجيلة• وهكذا هتلاقي عند أهل كل قرية سبب من اختراعهم.
•
بعض المثقفين افترضوا إن السنبلاوين كانت مخازن غلال مصر في عصر سيدنا يوسف، لأنه عاش بالقرب من السنبلاوين، وكلمة «سنبلة» جايه من سنابل القمح، فبحثت عن أصلها في القرآن، وفي الأصول العبرية، فوجدت أصل عبري يهودي للكلمة اسمه «سببتو»، والجزء الثاني من كلمة سنبلاوين هو «وين » فيبقى أصل الكلمة «السنبلا- أون» أي « مدينة سنابل القمح ذات الأعمدة» ولكن هذا الكلام غير صحيح لأن مفيش كلمة سنبلة في اللغة المصرية القديمة وأساسًا السنبلاوين موجودة قبل الفتح الإسلامي ، والأهم إن كلمة مخازن الغلال في اللغة المصرية القديمة تنطق «طوخ» وفيه 14 قرية مصرية بهذا الاسم منهم قرية في السنبلاوين اسمها «طوخ الأقلام» يعني القرية دي هي اللي كانت مخزن غلال، والسنبلاوين عاش فيها ملوك وفيها حركة عامرة مينفعش تبقى مجرد مستودعات للقمح.
بعد فترة وجدت مقال للمفكر «عباس العقاد» ذكر فيه السنبلاوين وقال إن كلمة السنبلاوين أو السمبلاوين أصلها الكلمة اليونانيةSymbolon ودي معناها الرمز أو الشعار، وإن قرية أبو سمبل المشهورة أصلها نفس الكلمة سبملون، لكن أنا قلت إيه «رمز» دي؟ دا حتى مخازن الغلال ليها معنى وفيها جاذبية وتشويق.
ولكن بعد ما تعمقت في قراءة مراجع لغوية يونانية اكتشفت إن كلمة «سمبلون» كانت بتطلق في فترة سيطرة اليونانيين على مصر• على مناطق الالتقاء التجاري بين الدول والأقاليم والمدن الكبرى• لفض المنازعات التجارية وحماية التجارة الحرة • حاجة مشابهة للمنطقة الحره في بورسعيد، أو «جنيف» في سويسرا ، في الحقيقة دا أكتر تفسير علمي مقنع لكلمة السنبلاوين اللي كانت مركز تجاري ونقطة التقاء فعلا، خصوصًا إن كلمة سمبلون كلمة بسيطة مفيهاش تحوير.
•
دلوقت أصبح عندك عدة تفسيرات ثالثها هو الأدق• الأول: «السنبلة فين؟» وسيميل نحوه عشاق الحواديت والثاني مدينة «سنابل القمح ذات الأعمدة» وسيميل نحوه أصحاب النزعة الدينية والاسم الثالث «سمبلون» سيميل نحوه أصحاب النزعة العلمية.
تحب تعرف أصل اسم مدينة إيه تاني؟
د. إيهاب الشربيني
أتمنى ممن ينوي نسخ هذا الموضوع في صفحاته أو المواقع والصحف التحلي بالأمانة وعدم إغفال اسمي.
نقلا عن صفحة: حكايات مصر المنصورة
