اللي في الصورة ده؛ أقدم سلف مشترك معروف لكل الثدييات الموجودة على الأرض.. واللي احنا منها بالمناسبة يعني.
زمان في فترة تُعرف بالعصر البرمي (Permian)، كان فيه مجموعة من الكائنات اسمها التيرابسيدات (Therapsids). الكائنات دي كانت مسيطرة على البيئات الأرضية، ومنهم خرجوا أجدادنا القدماء اللي في النهاية اتحولوا لثدييات، بما فيهم إحنا البشر.
لكن السؤال اللي كان محير العلماء دايمًا: التيرابسيدات دي ظهرت فين؟ وبدأت إمتى؟
دراسة جديدة منشورة في “نيتشر كومينكيشن” تعملت على هيكل عظمي متحجر كشفت مجموعة ضخمة من المعلومات الجديدة كُليًا عن الحيوان ده.
الهيكل تم اكتشافه في جزيرة مايوركا، اللي كانت جزء من القارة العملاقة بانجيا زمان. الأحفورة دي بتعود لفترة ما بين 270-280 مليون سنة، يعني قبل الديناصورات بوقت كبير.
العلماء استخدموا كمية كبيرة من العظام اللي لقوها، زي قطع من الجمجمة، فقرات، أضلاع، وعظمة فخذ محفوظة بشكل رائع.
العظام دي سمحت لهم بإعادة بناء شكل الحيوان، وقالوا إنه كان حجمه متوسط، وشكله قريب من شكل الكلب. لكن اللي يميزه أكتر هو وجود ثقوب في جانبي الجمجمة، دي أماكن عضلات الفك اللي بتربط، وده نفس التصميم اللي في الثدييات الحديثة.
كمان الحيوان ده كان من ذوات الدم الحار؛ زيه زي كل الثدييات حاليًا. وكان له أرجل عمودية على جسمه؛ على عكس معظم الزواحف اللي كانت رجليها شبه أفقية مع جسمها.
الحيوان ده بقى كان بيبيض؛ مش بيولد زي الثدييات.. وعشان كده؛ هو أقدم حلقة وصل مهمة؛ بين الثدييات والزواحف… لكنه في نفس الوقت ثديي!
طب ازاي الحيوان ثديي وهو يبيض؟
السؤال ده فعلاً مثير! الفكرة أن الثدييات في الغالب بيكون عندها خصائص مميزة زي الولادة الحية (مش بيبيضوا زي الزواحف والطيور)، لكن مش كل الثدييات زي بعض. فيه نوعين من الثدييات:
الثدييات المشيمية (زي البشر، والكلاب، والقطط): دول يولدوا صغارًا بعد فترة حمل طويلة في رحم الأم، وتكون الجنين متصل بالأم من خلال المشيمة (اللي بتوفر الغذاء والأوكسجين للجنين).
الثدييات اللاحمة (المجترات): دي نوع مختلف من الثدييات. زي الكوالا مثلًا. النوع ده يعتبر أقدم من الثدييات المشيمية وله خصائص مختلفة عن الثدييات العادية.
طب هل فيه ثدييات بتبيض؟
الحقيقة آه.. زي مثلًا البلاتيبوس (الخرنق المائي) اللي بيضع بيض زي الزواحف، لكن عنده القدرة على الرضاعة مثل الثدييات… الحيوان ده كمان من أقدم الثدييات الموجودة على الأرض.
يعني ببساطة؛ كل ما توغلنا أكثر في القدم؛ هنلاقي ثدييات أكثر بتبيض… فالمعيار بيكون هنا مش بتبيض ولا بتولد بس.
باختصار: هذا الكائن الذي يُشبه الكلب؛ هو ثديي يبيض وله دم حار؛ وهو سلف أكبر لكل الثدييات الموجودة على الأرض ده… سلف مشترك يربط جميع الثدييات ببعضها البعض على نحو ما.
نقلا عن الصفحة الرسمية على فيسبوك للصحفي المهتم بالشأن العلمي محمد منصور
