شعر / محمد عبد الجواد
ارجع بقى
لسه الحنين سهران ما نامشى
وادى العيون متشوقة
والحب فيها لسه حي
و دموعى تحلم باللقا
الزمن رافض يسيبنى
فى وحدتي دايما ويمشى
ارجع بقى
فاكر سعادتي قد إيه
لما كنت أحلم فى حضنك
والغرام باين عليك
والشوق واخدنى
وأنا منتظرة ابتسامتك
تيجى وتزورنى فى منامى
و تواعدنى
والفرح يسكن عيوني بدل البكا
ارجع بقى
يا حبيبى ارجع لي بقى طول غيابك
قلبى داب م العذاب
افتح له بابك
واسقى زهر الفرح
من ود المحبة
دا أنت لما تحضن قلبى
راح يرجع شبايك
أنا قلبى رغم البعد
عمره مرة ما يوم شكا
فارجع بقى .. ارجع بقى
