شعر محمد عبد الجواد
طمني ريحيني
هأبقى لعينيك النور
هنعدي أحزانا
ونعيش هنا وسرور
دا الحب بيجمع
آسر مع مأسور
والحزن بيعور
وبيطفي لمعانا
بنكون إزاز مكسور
طمني بوجودك
قولي صباح النور
تقوى زهور عودك
دا أنت عليك الدور
أنسى كلام الناس
أصله كلام مبتور
بيهد أفراحنا
ويزيد بقى جراحنا
وإن جينا أو روحنا
حافظين مطارحنا
ويقيدوا لينا النور
الضربة بتقوي
وتعيش عصور وعصور
وإحنا الزمن داسنا
علم علينا كتير
ولما شاف صبرنا
إدانا كأس تقدير
راهن على حلمنا
وكان راهن مغرور
وإحنا رفضنا نكون
كتور في ساقية يدور
حاسب بقى شوية
واهدى كده يا جميل
دا القلب لو مكسور
هعيش وهو عليل
وإنت يادوب هتكون
نقطة في سطر طويل
لو كنت مستني تكون رقم 1
هتوه هنا لوحدك
في زحمة التفاصيل
دا أنا اللي بيسيبني
بيجيلي بعده طابور
الناس نسور جارجة
صالحة بقى وطالحة
والزرعة لو طارحة
هتشم مسك الليل
سيب اللي متكبر
دوس ع اللي متجتبر
أنسى اللي مايقدر
قدر هتتقدر
سيب اي حد عويل
عايش عليك الدور
أصل الكلام بالطن
والفعل وزنه جرام
دبور بجهله زن
والوش بقى إجرام
من كتر عمله الردي
خايف يخش ينام
وبيتشتري محاسيب
بالمال وأصله حرام
نفسه يكون له سعر
وسط الكبار يا سلام
من إمتى كان الندل
أصيل يقف له قيام
الأصل بيعلي ابن الأصول بالذوق
جعان عمل قرشين
قال إنه ملك السوق
بكرة هيجي اليوم
من صنع إيده يدوق
وهيبقى مش مستور
#وعجبي
