Arabic Dutch English French German Japanese Portuguese
FacebookTwitterDiggGoogle BookmarksLinkedinRSS Feed
< أسعار العملات : دولار أمريكى ** بيع:17.79 شراء 17.69 جنية إسترلينى ** بيع :24.185. شراء:23.885 يورو : بيع 21.291 شراء : 21.036ريال سعودى : بيع :4.743 شراء : 4.716 درهم إماراتى : بيع:4,843 شراء :4.843 دينار كويتى : بيع :58,991شراء :58.644

الجمعة, 12 تشرين1/أكتوير 2018 10:59

أسئلة بلا إجابات .. قصيدة شعرية

كتبه 

 

شعر محمد عبد الجواد

 

لما أنت ناوى تبيع بسرعة 

كنت قول لى 

على الأقل كنت هأنوى أصوم وأصلى 

الأرض عرض .. 

بعد الوطن فى ايه 

فاضل لى .

دا أنا كنت عيدك 

كنت رهن إشارة واحدة 

من أصغر صباع فى ايدك

أنا كنت شايفك 

زى حلم الصيف طويل 

فى عز حره بلاقى ضلى 

هى الصراحة محرمة 

ولا المكاشفة مجرمة 

عشان ندور وسط الدواير 

والدنيا ضلمة معتمة 

أجيب منين حد يصارحنى 

وأجيب منين يوم حد عاقل 

عشان يقول لى 

أنا كنت زارعك زى بدر فى ليل سمايا 

مستنى طرحه فى أرضى يطلع 

وكنت شايفك دنيتى وأيام هنايا 

وكنت مستنى الأمل 

يشبك ما بين وردى وفُلى 

الكل عامل فيها مفتى 

وعشان غياب المعلومات 

عمال بيفتى 

اطلع علينا وقول لنا ايه الحكاية 

بلاش تسيب الكل ينهش 

بين دمانا ولحمنا 

والكل عامل عمنا 

واحنا اللى كنا تملى سندك 

كنا زادك ... 

وفى كل أوقات الانكسار كنا عمادك

كنا وقت البرد نتلم فى حضن الوطن 

وفى قلب أى معركة بنكون زنادك 

قلب الوطن صابه العفن 

وانا لسه حابس دمعتى 

وغُناك واصل لى 

فارد ضلوعى على المدى 

وشايف نهايتى 

ومعاك قلوعى اتمزقت 

ضاعت حكايتى .. ونسيت بدايتى

أنا كنت شايفك 

حاجة حلوة مزهرة 

تكتب ربيع 

وكنت شايفك زى شمس 

طالعة تتحدى الشتا 

طب ليه تبيع 

ومنين أجيب واحد مطيع 

يحمينى كُلى

أنا لسه فى  نبض فى عروقى

وعنيا فيها 100 رصاصة 

تحمى لى أرضى 

وايديا رغم الفقر والعوزة 

تقدر تصد 

وتجيب لى من قلب الغروب

أيام شروقى

وانا لسه واقف ع الرصيف 

مستنى رد 

والكدابين على الشاشات بيفرقونا 

ويشتتونا .. عشان نكون فرق كتير 

نصبين معارك ضد بعض 

انا لسه جوايا الأمل يقدر يحارب  

وعندى كم أسئلة 

محتاجة حد عشان يجاوب 

ملعون أبوك يادى السكوت 

هو احنا يا نسيب حقنا 

يتدفنونا بالحيا وأوام نموت 

ما كفاية لينا 5 سنين عايشين تجارب 

أصل الوطن شاف فى المحن كل العقارب 

واحنا اللى جمرات الوطن

فى ايدينا تلسع 

فبلاش يكون أصل الحكاية 

نبيع وطننا فى النهاية للى يدفع 

كل اللى بيطبل ياسيدى

عشان مصالحه أوام هيخلع

فى ناس تبيع وتشترى 

وناس بتطغى وتفترى 

وناس ما يقدر يوم عليها 

غير القوى 

وانا الوطن بالنسبة ليا 

هو سكنى .. هو عزى 

هو جنسية فؤادى .. 

هو لون دمى فى وريدى

هو عندى كل حاجة 

قول لى لو بعتوا الوطن 

أنا إيه فاضل لى ..

شارك الموضوع مع اصدقائك

Submit to DeliciousSubmit to DiggSubmit to FacebookSubmit to Google BookmarksSubmit to StumbleuponSubmit to TechnoratiSubmit to TwitterSubmit to LinkedIn

وسائط

المزيد من الاخبار

الإثنين, ۱۰ كانون۱/ديسمبر ۲۰۱۸
الإثنين, ۰۱ ربيع الثاني ۱۴۴۰