Arabic Dutch English French German Japanese Portuguese
FacebookTwitterDiggGoogle BookmarksLinkedinRSS Feed
< أسعار العملات : دولار أمريكى ** بيع:17.79 شراء 17.69 جنية إسترلينى ** بيع :24.185. شراء:23.885 يورو : بيع 21.291 شراء : 21.036ريال سعودى : بيع :4.743 شراء : 4.716 درهم إماراتى : بيع:4,843 شراء :4.843 دينار كويتى : بيع :58,991شراء :58.644

السبت, 07 تموز/يوليو 2018 10:50

حكاوى القهاوى .. قصيدة شعرية

كتبه 

 

 

  

 شعر / محمد عبد الجواد

 

السيرك منصوب فى القهاوى

كل أسرار البيوت والشوارع والحوارى

ناس بتيجى وناس تروح

اللى ناوى واللى غاوى

واللى نصاب والمخاوى

خلق فاضى بيشكى فقره

واللى عامل فيها قاضى

وللقمار بيبيع فى عمره

كله عامل نفسه فاهم

وهو أصلا فى الحقيقة

حمار حصاوى

********

واد يا عادل .. أيوه جاى

هات لى يا ابنى شيشة حمى

وهات معاها عصير وشاى

هات لى يا ابنى معاها طاولة

بس زود فى الحجارة

أصل يابنى الكيف مناولة

مش فتوة أو شطارة

هات لى يا ابنى معاها ولعة

دا إحنا صناع الحضارة

قبل ما يبنوا الهرم للناس منارة

خف يا بنى قوام بسرعة

أصلى رايح وانت جاى

*****************

واد ياسيد

شوف لى يا ابنى نص أحمر

لأجل اعمر النافوخ

اوعى تتريق عليا

او تقول للناس بادوخ

لو مفيش برشام معاك

شوف لى حتى كمان سيجارة

أصلى عندى هموم كتير

العيال راحوا المدارس

وانا مش لاقى الفلوس

والمدام طفشانة منى

والسبب هو الفلوس

مش عاجبها العيشة يعنى

بتعايرنى انى فقير

عايز أعلى الطاسة فوق

يمكن امتلك الفانوس

واشتغل طيار وأطير

والبلية تلعب معايا

وابقى يا ابنى شوية فوق

***************

فجأة واحد على صوته

عرفة جه

واقعة سودة يا واد يا صاصا

قال له هه

رد صابر .. قال له مالك

قال مفيش

لازم أمشى

قال له ليه

قال له يا ابنى عرفه جه

من شهور حاطط عليا

بيلاعبنى ومداينى

كل يوم دايما كاسبنى

وأنا مديون فى الحساب

انا خسران بالوراثة

وحظى دايما ليه تاعبنى

قال له ما تركز يا صاصا

هات معاه يا ابنى الخلاصة

حط يا ابنى سيه ودو

واقفل بالشيش الجوهار

لو سمعت نصحيتى يا ابنى

عمرك ما هتكون حمار

********************

فجأة جه واحد مكشر

وزعق بعلو صوته

صبرى مات

مرة واحدة الكل بلم

والضجيج قتله السكات

قام نبيل الكهربائى

قال يا عينى

ساب مراته لوحدها

أصله عنده 3 بنات

والبنات دول هم تانى

والغريب بيبص ليهم

والقريب دايما انانى

قام سعيد الصول وزعق

قال لهم ربك كبير

عمره ما بينسى اللى خلقه

عنده م الخيرات كتير

****************

فجأة قام دخل المعلم

جرسونات القهوة قاموا

كلهم عملوا انتباه

نصهم واقف مبلم

ونصهم خارج الحياة

إلا واحد كان حويط

جاب له قهوة مانو دوبل

وراح قوام طلع شريط

قاله بنصبح يا باشا

دا احنا من غيرك نجوع

أو نبات من غير عشا

أو نقضيها بسميط

قاله بس خلاص كفاية

انت هتحمرق معايا

يلا ياض هات الايراد

هو أنا فاتح وسية أو تكية

اوعى تفتكر انى نايم

المون بتهدروها

قلت ماشى

والشيش بتكسروها

قلت ماشى

اوعى تفتكر السيجارة

أو شريط برشام ملون

هيخلنى فى يوم عبيييييط

*******************

يلا يابنى رٌش ميه

وم الزباين هات فلوس

يلا حاسب عم عبده

وأوعى يهرب م الحساب

كل يوم اقعد وراقبه

هتلاقيه ليلاتى يسهر

عند أوشا ياكل كباب

شوف لى يا ابنى عم سيد

شال فلوس الفحم فين

هو أنا لازم أسيح

بيتوا عندى شوالين

واوعو تنسوا تجيبوا تلج

خزنوا دايما لوحين

والانابيب أمنوها

واقفلوا الابواب كويس

واصبحوا على ألف خير

شارك الموضوع مع اصدقائك

Submit to DeliciousSubmit to DiggSubmit to FacebookSubmit to Google BookmarksSubmit to StumbleuponSubmit to TechnoratiSubmit to TwitterSubmit to LinkedIn

وسائط

المزيد من الاخبار

رئيس الأركان يغادر إلى الصين لتعزيز التعاون العسكري

رئيس الأركان يغادر إلى الصين لتعزيز التعاون العسكري

غادر القاهرة الفريق محمد فريد رئيس أركان حرب القوات المسلحة
العبيدي: قاتل الصيدلي المصري ارتكب الجريمة مع سبق الإصرار

العبيدي: قاتل الصيدلي المصري ارتكب الجريمة مع سبق الإصرار

قال بهجت العبيدي مؤسس الاتحاد العالمي للمواطن المصري في الخارج
ماراثون الأنابيب

ماراثون الأنابيب

حمدى البطران كاتب ومفكر مصرى
يا شيخنا

يا شيخنا

الشاعر محمد خلف
انشودة القدس

انشودة القدس

شعر محمد عبد الجواد - مصر

الأحد, ۱۸ تشرين۲/نوفمبر ۲۰۱۸
الأحد, ۰۹ ربيع الأول ۱۴۴۰